Gudmundur Ingi

Guðmundur Ingi Þóroddsson

2026Nýjir straumar

AFSTAÐA Formaður - Réttindafélag

YALE Nám í umbreytingastjórnun

Um mig

Hver er Guðmundur Ingi?

Guðmundur Ingi Þóroddsson, 51 árs, uppalinn í Árbæ og Breiðholti. Ég bý ásamt eiginmanni mínum, Titu Ciprian Balea, sem er upprunninn frá Rúmeníu. Við höfum verið saman í 18 ár og giftir í 13 ár. Titu hefur verið ómetanlegur stuðningur í lífi mínu, bæði í daglegu lífi og í baráttu minni fyrir réttindum þeirra sem standa höllum fæti í samfélaginu. Hann hefur einnig gert mig að betri manni með sinni styrku jarðtengingu og ég læri stöðugt af honum. Að helga lífi sínu fyrir baráttunni fyrir mannréttindum og réttlátu samfélagi er eitthvað sem hefur verið tekið mjög alvarlega á mínum bæ.

Undanfarin ár hef ég verið formaður Afstöðu-réttindafélags, félagasamtaka sem vinna að réttindum dómþola og þeirra sem glíma við jaðarsetningu í íslensku samfélagi. Hef staðið í fremstu víglínu fyrir skaðaminnkunarstefnu og öðrum mikilvægum málefnum sem varða félagslega velferð.

Í starfi mínu á Velferðarsviði Reykjavíkurborgar hef ég beitt mér fyrir málefnum heimilislausra og tryggt að þeir fái stuðning og þjónustu sem þeir eiga rétt á. Stoltur af því að hafa tekið þátt í fjölmörgum nefndum og ráðgjafahópum fyrir ríki og sveitarfélög. Sem formaður Afstöðu-réttindafélags hef ég skipulagt allt starf félagsins, aflað sjálfboðaliða og unnið náið með stjórnvöldum, fangelsisyfirvöldum og velferðarþjónustu til að bæta stöðu jaðarsettra hópa.

Sit í fagráði Rauða krossins um aðstoð eftir afplánun og hef starfað sem sjálfboðaliði fyrir Frú Ragnheiði og nýverið útnefndur Mental Health Ambassador -EU Promens í samstarfsverkefni Evrópusambandsins.

Er auk þess leiðbeinandi (faculty mentor) hjá Yale LET(s)Lead Academy, Lived Experience Transformational Leadership Academy, við Yale-háskóla. Sem leiðbeinandi styð ég og leiði tilvonandi leiðtoga á Íslandi. LET(s)Lead er hluti af Yale Program for Recovery and Community Health innan geðlækningadeildar Yale School of Medicine.

Nefndarstörf og verkefni

Starfshópur um stefnu stjórnvalda í skaðaminnkun
Starfshópur um afglæpavæðingu neysluskammta
Starfshópur um stefnu stjórnvalda í áfengis- og vímuefnamálum
Starfshópur um bætta stöðu fanga eftir afplánun
Óformlegur starfshópur ríkislögreglustjóra um EXIT (aðstoð úr undirheimum)
Ráðgjöf fyrir borgaraþjónustu Utanríkisráðuneytisins vegna erlendra fanga
Fulltrúi í fagráði Rauða krossins um aðstoð við fanga eftir afplánun
Vinnuhópar í heilbrigðisráðuneytinu um meðferðarmál og geðheilbrigðismál fanga
Vinnuhópar um umbunakerfi og deildarskiptingar í fangelsum
Vinnufundir og samskipti við félagsráðgjafa Reykjavíkurborgar
Fyrirlestrar og fræðsla fyrir ráðuneyti, fangavarðaskólann, lögreglufræði Háskólans á Akureyri, félagsráðgjöf Háskólans Íslands og lögfræði Háskólans á Akureyri
Virkt samráð og kynningar hjá erlendum fangelsisyfirvöldum og systursamtökum Afstöðu erlendis
EU-Promens Mental health ambassador – Czeck republic 2025

Menntun

MS í forystu og stjórnun - Háskólinn á Bifröst (í námi)
Meistaranám í opinberri stjórnsýslu - Háskóli Íslands (í námi)
Umbreytingastjórnun - Yale School of Medicine
BA í félagsráðgjöf - Háskóli Íslands
Stúdentspróf - Verzlunarskóli Íslands

Stefnumálin

ÁHERSLUR

Húsnæði og mannréttindi

Reykjavík þarf að tryggja að fólk geti eignast íbúð.
Þétting byggðar og uppbygging nýrra hverfa eiga að fara fram samhliða, í jafnvægi. Ekki má leggja allt á eitt, hvort heldur er, innri þétting eða útvíkkun.
Félagslegt íbúðaframboð þarf að aukast verulega og fjölbreytt húsnæði að vera í boði fyrir ólíka hópa.

Samgöngur og borgarskipulag

Við þurfum umferðarmiðstöð í Breiðholti, hraðari tengingu við Keflavíkurflugvöll og Sundabraut sem að mínu mati væri kostur að hafa í göngum.
Reykjavíkurflugvöllur á aðeins að sinna sjúkra- og neyðarflugi, annað flug á heima í Keflavík.

Ný og sterkari forysta

Með meirihluta í ríkisstjórn og borg landsins, skapast raunverulegt tækifæri til að hrinda í framkvæmd sameiginlegri stefnu okkar í húsnæðismálum.

Félagslegur jöfnuður

Jöfnuður í öllum hverfum

Þjónusta og aðgengi að menntun, samgöngum og menningu þarf að ná til allra borgarhluta. Engin hverfi skulu jaðarsett.

Fjárhagsstuðningur

Einstaklingar sem þurfa að sækja um fjárhagsstuðning frá borginni eiga ekki að þurfa að vera kominn upp á maka til að sækja um slíkan styrk. Það getur þýtt að fólk og oftast konur séu fjárhagslega háð maka sínum og geti ekki verið sjálfstætt.

Jafnrétti barna

Börn sem alast upp í fátækt og eru send svöng í skólann eru líklegri til að misstíga sig síðar á lífsleiðinni. Við erum að tala um börn foreldra, sem er vinnandi fólk en getur ekki greitt reikninga á eindaga og hefur ekki efni á staðgóðri máltíð annan hvern dag. Margt af þessu fólki vinnur hjá borginni og við verðum að gera betur.

Ábyrgð og umhyggja

Atvinna fyrir alla

Reykjavík á að bjóða öllum sem vilja og geta vinnu við hæfi, líka fólki með geðvanda, vímuefnavanda eða sem hefur afplánað refsingu. Með stuðningi getum við lyft fólki upp og bætt samfélagið.

Reynsla = Menntun

Mikilvægt er að reynsla í starfi verði viðurkennd meira í stöðuveitingum hjá borginni og metin á við menntun. Styðja þarf betur við raunfærnimat og nýta betur í borgarkerfinu.

Þrýsta á ríkið

Reykjavík er stærsta sveitarfélag landsins. Við verðum að nýta þá stöðu til að þrýsta á ríkisvaldið um réttlátan stuðning, t.d. í málefnum heimilislausra, sem nú eru alfarið á kostnað borgarinnar og við málaflokk fatlaðra sem er mikilvægur en vanfjármagnaður.

Úrræði og stuðningur

Stuðningur við jaðarsetta

Við þurfum fagleg og mannúðarleg úrræði fyrir fólk með fjölþættan vanda. Ég legg áherslu á að lágþröskulda heilbrigðisúrræði og skaðaminnkun verði kerfisbundinn hluti af þjónustu borgarinnar. Málaflokkur heimilislausra verður að taka föstum tökum og bæta.

Reykjavíkurborg á að vera fyrirmynd við að taka á móti fólki eftir afplánun og finna húsnæðismálum, meðferðum, stuðningi og atvinnu farveg þannig að þeir einstaklingar fara af varanlegri framfærslu, hætti glæpum og byrji að greiða skatta til baka til samfélagsins. Þannig fækkum við þrotaþolum.

Meðferðir ungmenna

Borgin verður að styðja betur við ungmenni með fjölþættan vanda og aðstandendur þeirra með bæði andlegum og fjárhagslegum stuðningi. Það er staðreynd að við erum að missa börn og ungmenni í blóma lífsins. Það er auðvitað ekki bara borgin sem er ábyrg fyrir því en við getum svo sannarlega hjálpað. Þetta er forgangsverkefni að minni hálfu.

Styðja áfangaheimili

Styðja þarf betur við áfangaheimili í borginni og bjóða þeim sem slíkt reka að nýta autt húsnæði borgarinnar til að opna fleiri slík gegn skýrum reglum, skilyrðum og virku eftirliti sem í dag er ábótavant.

Stolt borg

Hinsegin Reykjavík

Ég vil Reykjavík þar sem öryggi, sýnileiki og aðgengi hinsegin fólks og aðstandenda þeirra er tryggt í verki. Málefnið er mér hugleikið enda tilheyri ég þeirri fjölskyldu og er þakklátur fyrir það og stoltur.

Þriðji geirinn

Félagasamtök halda samfélaginu uppi. Ég vil bæta samninga borgarinnar við þau, forgangsraða styrkjum til samtaka með raunverulega þörf og útiloka að háfjármagnaður félagsskapur fái fjárveitingar á kostnað grasrótarinnar.

Fjölmenning og innflytjendur

Tryggja þarf tungumálaaðstoð, fræðslu og sanngjarna aðkomu innflytjenda að samfélaginu, ekki síst þeirra sem vilja mennta sig og leggja sitt af mörkum. Verandi giftur innflytjenda þekki ég vel fordóma og erfileika sem þessi hópur glímir við daglega.